تزوجت بقيت فترة طويلة لداخل ديالي واحد الخوف من الدار جديدة

 فاش تزوجت بقيت فترة طويلة لداخل ديالي واحد الخوف من الدار جديدة ، مكنتش كنعس مزيان ، كنت كنحشم نعس نعستي الطبيعية او أني ناكل قدامو على طبيعتي أو ندخل لطواليط 

تاني يوم زواج دارهم جاو عندنا ، گلسو وكان خاصني نطيب الماكلة فدخلت نوجدها ، لقيتو دخل ورايا جبد العصير وخواه في الكيسان وهز الصنية وخرج 

فاش ختو لي مسافرة بغات تدخل تشوف الدار من لداخل ، قاليها "دقيقة" ودخل تأكد أن الدار من لداخل نقية ، دخل بيت النعاس جمعو بزربة حيت جاو الصباح بكري 

وهز أي حاجة شافها قدامو ، ومن بعد خرج قاليها "دخلي"  

كانت حرارتي كطلع دايما ، فاش حس أني عييت وبديت كنشد راسي وأنا واقفة في الكوزينة دخل بعدني على حرارة البوتيجاز ووقف بلاصتي وقالي "نعتي ليا على الحاجة وأنا غنديرها"

محشمش من ماماه لي دخلت علينا فجأة ولقاتني واقفة كنصايب شلاضة وهو لي كيحمر الدجاج ، ضحك قدامها وقاليها "ولدك ولا مرا ديال دار حادك" ، قالت ليه "في دارنا مكنتيش كتبغي تجمع بلاصتك " ضحك في وجهها وسولني "نطفي عليه دبا ولا بلاتي"

حطيت الماكلة وكنت لابسة عباية تبهدلت من الوقفة في الكوزينة ولاكن أنا مكنتش حاسة بحتى حاجة من غير أني دايخة 

قالي أجي نقول ليك ، دخلت لقيتو جابد عباية وشادها

"هاد العباية كتجي معاك ، لبسيها " تسناني حتى لبست وخرجنا بجوج وگلس حداية ، بعد ما سالينا ، ناض هز معايا الماكلة وتأكد أن حريق الراس نقص شوية 

واحد المرة كنت معاه في دار عائيلتو ، وماماه كانت هازة واحد المرهم كتدهن بيه رجليها ، خديت من عندها المرهم باش نديرو ليها أنا ، نوضني وتربع قدام رجليها وشد المرهم ومسد ليها رجليها 

حسيت أنه فرحان وهو كيدير هاكة فسولتو علاش نوضتيني من قدامها ، قالي "نتي كنتي غديري هاكة حيت حسيتي أنه من الواجب ديريه ، أنا ما باغيكش ديري شي حاجة غير ونتي باغة ديريها فعلا"

تخاصمنا بجوج واحد المرة وكنت موجدة باليزتي باش نمشي لدارنا ، كنت گالسة في بيتي كنبكي وسادة الباب على راسي 

باب الدار فيه الدقان وكان خوه ومراتو جايين عندنا ، حل ليهم وگلس معاهم ومن بعد دخل دق عليا وقالي خرجي سلمي عليهم وماتحسسيهمش أنه حنا مخاصمين ولا مقلقين من بعضيانا

مسحت دموعي وخرجت مبتاسمة في وجههم وگلست معاهم ، گلس حداية وضحك معايا وكان كيوجه ليا بزاف ديال الهضرة باش نجاوبو ، ويحط يدو على كتفي ويبتاسم ليا

خلاني گالسة معاهم ودخل خوا الباليزة ، وكتاشفت من بعد أنه هو لي صونا على خوه ومراتو وعرض عليهم عندنا باش يعرف يتصالح معاية بهاد الحجة حيت كنت مصممة نمشي 

وفعلا ماكاينش إنجاز كبر من انك تختاري الشخص الصحيح ، ماتسخايش عليه ويعرف يكبر بيك قدام الناس ويدير ليك أعذار  

"كانت تليق بي ، وأنا خلقت خصيصآ لأليق بها"

ساليتي ياك اوا نوضي غسلي داك لفراش لي فزݣتي 🥱